21. 12. 2022: СБУ по разії означіла русиньскый флаґ як флаґ „републікы“. Лож на Русинів

В середу, 14-го децембра 2022-го року, Служба безпекы Україны (СБУ) робила далшы разії в будинках, якы належать Україньскій православній церькви. СБУ знова означіла церьков як Україньску православну церьков Московского патріархату.

В скорых раннїх годинах в тот день безпека зачала робити разію і на теріторії Хресто-Воздвиженьского собору в містї Ужгород, котрого настоятелём є отець Димитрій Сидор, познатый з русиньского руху.

Хоць СБУ офіціално оголосила, же подїя была заміряна на проросійску діверзію і далшы з тым повязаны дїла, безпечностній службі перешкаджали в Ужгородї русиньскы артефакты.

Флаґ „републікы“

На знимках, котры были публікованы Службов безпекы Україны можеме відїти русиньскый флаґ. Но СБУ в офіціалнім выголошіню пише, же нашли „прапор так званой адміністратівно-теріторіалной єдиніцї Републіка Підкарпатьска Русь.“ Што властно СБУ нашла?

Русины офіціално прияли свою сімболіку в рамках Світового конґресу Русинів у 2007-ім роцї. За свій ерб Русины прияли ерб, котрый в часах меджівойновой Чехословацькой републікы, до котрой складу належала і втогдышня Підкарпатьска Русь, днешня Закарпатьска область Україны, быв ербом земскым, теріторіалным.

Тот самый ерб хоснує і днешня Закарпатьска область Україны, но за свій го прияли і вшыткы Русины світа посередництвом конґресу.

Флаґ быв запропонованый русиньскым ученым, в благій памяти Михаілом Алмашійом, котрый пропоновав лем флаґ у формі, же у верьхній половині є синя фарба, в нижній половині є точно на половину біла і червена фарба. Кедь Світовый конґрес Русинів у 2007-ім році рїшыв о народній сімболіцї, доїднало ся, же на флаґу буде і высше спомянутый ерб.

Флаґ, котрый нашли на теріторії православного собору, є русиньскый флаґ, і не має нич з „Републіков Підкарпатьска Русь“, котра, по перше, не існує, і по друге, котру не оголошають ани єдна русиньска орґанізація як на Українї, так в іншых країнах.

Навеце, русиньскый флаґ много раз хосновав ся на русиньскых подїях, котры проходили на теріторії Україны, і ниґда не быв властями поважованый за даякый сепаратістічный флаґ, ани Русинам на їх подїях не было заказане хосновати го.

Налїпка лем.фм, русиньскы співанкы і гімна

І далшы фотоґрафії, котры были публікованы з разії, суть інтересны. Кедьже думаме, же то, што СБУ публіковала, має быти доказом діверзії, спомяньме, што на знимках было.

На фотоґрафіях з разії в Ужгородї было наприклад ЦД русиньского співака Владислава Сивого з назвов Образы із нашого жывота. Проблемов мало быти і найджіня нотації Гімны підкарпатьскых Русинів, котра была зроблена на текст Александра Духновіча, а в меджівойновім періодї ся окрем чеськой і словацькой гімны часто хосновала на Підкарпатьскій Руси при святочных принагодах.

Покля Світовый конґрес Русинів прияв за гімну Русинів Вручаніє од Духновіча, Русины на Підкарпатю паралелно хоснують і гімну з меджівойнового періоду. Но так само не мож бісїдовати, же тото має быти інштрумент діверзії і російской пропаґанды, ці якогось сепаратізму.

На фотоґрафіях мож відїти і налїпку нашого радія лем.фм, ці єдну пропозіцію нового русиньского ербу, котра походить з книжкы Мілана Яна Піліпа з назвов Русиньска народна сімболіка, яка вышла на Словакії в роцї 2014.

Припоминаме, же Піліп довгодобо просаджує зміну сімболікы, главно ербу, котрый бы належав лем Русинам як народу, і не быв повязаный з ербом бывшой Підкарпатьской Руси в рамках Чехословакії. О темі бісїдовало ся і на Світовых конґресах Русинів, но дотеперь не было охоты з боку конґресу сімблоліку мінити.

Піліп своёв публікаціёов хотїв вырїшыти і неєднотность хоснованя сімболікы, кедьже много раз хоснує ся неправилно, проблемы суть ці уж з тым, як має вызерати медвідь в ербі, або де має быти ерб на флаґу, кедьже дакотры хоснують флаґ з ербом, котрый не є в серединї.

Но в жаднім припад русиньскый флаґ не быв приятый як флаґ „републікы“, але як флаґ народный.

Проблемов подля СБУ, кедьже то публіковала меджі знимками, є і ікона Собору карпаторуськых святых, не беручі до увагы історічный контекст і то, же „карпаторуськы“ святы суть властно русиньскы святы, не російскы, ці „кремельскы“ святы.

Русины одсудили войну

Припоминаме, же Русины ся такой на початку войны поставили проти нёй. Вшыткы релевантны русиньскы орґанізації на Українї, в европскых країнах і в Северній Америці, в тім чіслї і сам Світовый конґрес Русинів, меджінародна русиньска орґанізація зареґістрована на Словакії, ясно одсудили войну.

Назвали правым меном, хто є аґресором, же є то Російска федерація, а так само высловили свою солідарность з Українцями і вшыткыма далшыма народностями, котры жыють на Українї.

Єдночасно припомянули, же права Русинів мусять быти рїшены, Русины на Українї мусять быти признаны, но пріорітов русиньскых орґанізацій є самособов закінчіня несправедливой з боку Російской федерації войны проти Україны, котра ся лем бранить.

Наперек ясній позіції Русинів односно войны, СБУ подля публікованых знимок поважує русиньску сімболіку ці русиньскы співанкы за „огрожіня“ ці „діверзію“. Звернийме увагу і на то, же Світовый конґрес Русинів ниґда не прияв Російску федерацію за члена, хоць намагы о то были.

Україна прияла меншыновый закон

У віторок, 13-го децембра 2022-го року, Верьховна рада прияла закон о народностных меншынах, котрый є ключовым условієм про вступ до Европской унії.

Депутат парламенту і член комітету про людьскы права, деокупацію і реінтеґрацію дочасно окупованых теріторій, народностны меншыны і меджінародны односины Тарас Тарасенко подля выголошіня публікованого на сайтї Верьховной рады Україны припомянув, же ёго комітет на тім робив два рокы.

Пояснив, же документ шпеціфікує права народностных комуніт на Українї і дає ґаранції їх етнічного і културного розвитку. Подля приобіцяня посланця „на никого ся не забуде і не буде існовати жадна діскрімінація“.

Мы уж лем припоминаме, же діскрімінація єствує, кедьже Русины дотеперь не были узнаны і їх сімболы теперь стали „проблемов“ про СБУ.

Петро МЕДВІДЬ, ЛЕМ.фм. Ґрафічна і языкова коректура: АРК в СР.